DAVAO CITY – Subli nga nanawagan ang Davao City COVID-19 Task Force ug Commission on Elections (Comelec)-Davao sa mga Dabawenyos nga mutamud sa health protocols sa nagsingabot nga eleksiyon sa Mayo 9, 2022.
Sumala pa kang Dr. Michelle Schlosser, tigpamaba sa Davao City COVID-19 Task Force, gumikan kay nagpabilin pa ang risgo sa COVID-19 transmission, kinahanglan sa mga tawo nga adunay igo nga disiplina.
Dugang sa nahisgutan nga daku pa gihapon ang tsansa nga matakdan ilabi na kung anaa sa mga panagtapok sama na lamang sa election, kasal, birthday o panagtapok sa maghigala.
Gipasabot sab niini ang kamahinungdanon sa pagsupot ug facemask sa tanan nga panahon gawas na lamang kung mukaon o moinom.
Gawas sa pagsuot ug facemask, makatabang sab arun nga ma-proteksiyonan batok kagaw ang bakuna ingon man booster shot ug ang kanunay nga hand hygiene.
Sa mga botante mas maayo sumala pa kung magdala ug kaugalingon nga ballpen sa higayon nga muadto sa mga polling precincts.
Samtang gikanayon sab ni Atty. Gay Enumerables, Comelec 11 assistant regional director bisan nga adunay resolusyon nga gawas sa face masks, gi-require sab ang face shield atol sa mismong adlaw sa eleksiyon, apan gitataw sa opisyal nga magdepende pa gihapon kini sa IATF guidelines.
Gipasabot sab ni Enumerables nga kung ang botante adunay temperatura nga 37.5 o mas taas pa, kinahanglan nga dad-on kini sa isolation polling place (IPP), usa ka lawak tulonghaan nga duol lamang sa entrance sa mga medical personnel.
Samtang ang balota sa mga nahisgutan ang itunol ngadto kanila ug sila ang mosulod niini sa IPP.
Sa higayon nga mahuman na sila sa pagboto, mamahimo na nga makauli ang mga nahisgutan.
Sa higayon nga gikan sa init ang botante, mas maayo nga magpahulay una kini aron nga dili musaka ang temperatura dayon moinom ug tubig ayha mopailalom sa thermal scanning.
Gi-awhag sab ni Enumerables ang mga botante nga muadto ug sayo ug magdala na lamang ug listahan sa ilang kandidato.
Gitambagan sab niini ang mga botante nga dili magsuot ug T-shirt nga adunay pangalan ug hulagway sa mga kandidato ingon man magpa-selfie sa balota.
Ang susama nga lakang ang ginadili ilabi na nga makonsidera kini nga election offense ilabi na nga matapos na ang campaign period sa Mayo 7 o duruha ka adlaw ayha mismong adlaw sa eleksiyon.
