DAVAO CITY – Subli nga gipahimangnoan sa Commission on election (Comelec) ang mga botante nga na-deactivate ang ilang mga pangalan nga asikasohan na kini ug dili na maghulat pa ug deadline sa Setyembre 30, 2019.
Sumala pa kang Atty. Krisna Samantha Caballero, tigpamaba sa Comelec 11, angayan nga pahimuslan sa mga botante ang ilang gipahigayon nga mga satellite registration aron nga makahimo pagboto ang mga nahisgutan sa Barangay ug SK elections.
Una na sab nga nasayran kang Caballero nga base sa record sa ahensiya, mukabat ngadto sa 127,604 ang deactivated nga mga botante sa dakbayan sa Davao diin 87,634 niini ang unang distrito; 1,278 sa second district ug 38,692 sa ikatulong distrito.
Mas maayo sab sumala pa kung sayo nga moadto sa ilang buhatan ang mga botante aron nga mabalik dayon ang ilang mga pangalan ug masayran sab niini ang numero sa ilang presinto diin sila moboto.
