DAVAO CITY – Gipahimangnoan sa Commission on Election (Comelec) XI ang mga lokal nga kandidato nga dili hulaton ang deadline ugmang adlawa, Hunyo 13 sa pagduso sa ilang statement of contributions and expenditures (SOCE).
Sumala pa kang City Election Officer Krisna Samantha Caballero nga ang mga kandidato nga pakyas sa pag-comply mamahimong mag-atubang ug silot.
Gitataw sa opisyal nga tanan nga mga kandidato mandato nga mosumite ug SOCE bisan kung napildi o midaug kini sa milabay nga eleksiyon ilabi na nga susaman nga migasto ang mga nahisgutan.
Ilalom sa balaod, kinahanglan nga iduso ang SOCE, 30 ka adlaw human ang eleksiyon o natunong kini karong adlawa Hunyo 12 apan gisibog lamang gumikan sa kasaulogan sa Independence Day.
Ang mga kandidato nga pakyas sa pagsumite sa SOCE ang mag-atubang ug administrative fine gikan sa P1,000 ngadto na sa P10,000.
Human ang deadline, bugtong ang SOCE sa mga midaug nga kandidato ang dawaton sulod sa unom ka bulan apan dili nila tugtan ang mga nahisgutan nga makasugod sa ilang trabaho.
