DAVAO CITY – Gipulong na sa Coordinated Operations to Defeat Epedemic (CODE) team ang level 2 ug 3 private hospitals dinhi sa dakbayan sa Dabaw aron pagahisgutan ang pagtabang niini sa pag-atiman sa COVID-19 patients dungan sa pagtaas sa occupancy rate sa Southern Philippines Medical Center (SPMC).
Subay sa maong panagpulong, gihangyo sa CODE team ang mga pribadong ospital nga mugahin og 20% sa ilang room capacity alang sa COVID-19 patient.
Sumala sa pamahayag ni Committee on Health Chairperson Coun. Mary Joselle Villafuerte nga andam matud pa mutabang ang mga balay tambalanan apan ning kasamtangan, usa sa ilang suliran mao ang kakulang sa Personal Protective Equipment (PPE) lakip na ang mga personahe nga mututok sa COVID-19 patients.
Hinuon nagpasalig ang Department of Health (DOH) nga tabangan sila sa maong suliran.
Subay sa datos sa DOH XI, anaa sa 92.93 % ang occupancy rate sa ICU beds alang sa COVID-19 patients samtang 81.74% ang occupancy rate sa ilang ward beds.
