DAVAO CITY – Magsugod na karong adlawa, Hunyo 1, ang closed fishing season sa Davao Gulf. Sumala sa Bureau of Fisheries and Aquatic Resources kon BFAR 11, anaa na sa ika-11 ka tuig ang pag-obserbar niini nga nagtumong sa pagpadaghan sa daghanang mga isda nga gipatubo sa mga kadagatan sa Davao Gulf.
Subay kini sa pakigtambayayong sa Department of Interior and Local Government (DILG) pinaagi sa Administrative Order (JAO) No. 02 series of 2014, nga nagmando sa mga mananagat nga bawal na ang pagpanguha og mga isda, ilabi na sa pipila ka mga klase niini sama sa karabalyas, moro-moro, matambaka ug galunggong; ug ang pagdakop niini gamit ang commercial fishing vessels nga dunay bagnets kon basnigan, ringnets kon tapay-tapay, ug mga pukot nga gagmay ang buslot.
Pagpaklaro sa ahensya nga tugutan gihapon ang hook o line fishing basta dunay pagtugot gikan sa LGU o BFAR. Gisaad sa ahensya nga mas pakusgan pa ang ilahang monitoring sa mga kadagatan pinaagi sa Fisheries Protection and Law Enforcement Group sa rehiyon alang sa pag-obserba sa closed fishing season.
Mamahimong mag-atubang ang mga magmalapason niini gikan 6 ka bulan hangtod 6 ka tuig nga pagkapriso, P6,000 nga multa, pagkakumpiska sa ilahang kinuha nga isda ug kanselasyon sa ilahang lisensya.
Manukad ang closed fishing season sa Davao Gulf gikan Hunyo 1 hangtod Agosto 31, ning tuiga.
via || Bombo LJF
