DAVAO CITY – Mipahimutang na ang City Veterinarians Office ug animal quarantine area sa tulo ka mga land entry points sa dakbayan sa Dabaw.
Sumala kang Dr. Cerelyn Pinili, hepe sa City Veterinian office, usa kini sa mga preventive measures nga ilang ipatuman aron mapugngan ang pagsulod sa African Swine Fever (ASF) virus sa syudad.
Ang nahisgutang mga quarantine areas ang gipahimutang sa checkpoints sa Sirawan sa Toril, Lacson sa Calinan ug sa Lasang, kung diin kaabag sa ilang operasyon ang Task Force Davao.
Gawas sa pag-inspeksyon sa mga bagahe nga dala sa mga pasahero pasulod sa syudad gamit ang x-ray machine sa TFD, mipahimutang sab ang City Vet ug footbath alang sa mga sakyanan ug pasahero nga mosulod sa syudad.
Pahinumdom na lamang sa opisyal ngadto sa publiko nga makig-alayon sa kagamhanan aron mapugngan ang pagsulod sa nahisgutang virus nga posibling maka-apekto sa P20 billion nga swine industry sa Davao Region.
