Andam na ang City Health Office (CHO) ingon man mga health professionals sa ipahigayon nga massive vaccination karong Oktubre 14 aron nga batukan ang polio virus.
Sa gipahigayon nga forum kalabot sa Oral polio vaccination, nagpakita sa ilang kaandam ang mga hingtungdan ahensiya sa kagamhanan ingon man pribadong sector sa higayon nga sugdan na ang nahisgutan nga lakang.
Una na sab nga nanawagan si Dr. Josephine Villafuerte, head sa CHO ngadto sa mga ginikanan nga walay angayan nga kabalak-an ang mga nahisgutan sa bakuna gumikan kay luwas kini sa mga bata.
Nasayran nga dugay ng kontaminado sa polio virus ang Davao river ayha pa man gipagula sa Department of Health (DOH) ang resulta sa gipahigayon nga eksaminasyon sa maong sapa.
Gikanayon sab ni Villafuerte nga bastante ang ilang mga sakop ingon man volunteers nga magpahigayon ug bakuna sa mga Health centers, malls, terminals ingon man magpahigayon ug house to house nga pagbakuna sa mga bata.
