DAVAO CITY – Gibasura sa konseho ning siyudad ang panawagan sa ilang mga miyembro nga magpahigayon ug imbestigasyon kalabot sa pagpasara sa Salugpungan Ta’tanu Igkanugon Community (Salugpungan).
Uban ang kinatibuk-ang 17 votes, 16 ka mga konsehala ang miboto ug “no” alang sa reconsideration sa unang pagbasa sa item nga giduso ni Konsehal Pamela Librado-Morato nga nag-awhag sa subling ablihan ang Salugpungan schools sa siyudad.
Ayha ang gihimong pagboto, mi-alma si Librado-Morato sa pagpapas sa ilang item nga walay igong pagpahibalo kaniya.
Nasayran nga absent ang nahisgutan niadtong panahona dihang gi-delete ang iyang item.
Una ng gibutyag ni Konsehal Danilo Dayanghirang nga babag siya sa lakang ni Librado-Morato gumikan kay magamit lamang kini isip propaganda tool.
Gitataw sab ni Dayanghirang nga laraw sumala pa ni Davao City Mayor Sara Duterte-Carpio nga permanente na nga pasirad-an ang operasyon sa tulonghaan gumikan sa mga kalapasan nga nahimo niini.
Nagpagula na sab sumala pa ang Department of Education (DepEd)-Davao ug kamandoan nga pasirad-an ang tulonghaan pinasikad sa resolusyon gikan sa fact-finding committee nga gitahasan sa departamento.
Una ng gi-anunsiyo sa DepEd-Davao ang pagpasara kaniadtong Oktubre 8, duruha ka bulan human kini gisuspende.
