DAVAO CITY – Sugdan na sa City Health Office (CHO) ang expanded immunization program sa dakbayan sa Dabaw nga dinungan nga himuon sa anti-Covid Vaccination activities sa lagyo ug hilit nga mga barangay aron malikayan ang outbreak sa uban pang mga sakit taliwala sa mipatigbabaw nga coronavirus pandemic.
Gikanayon ni Vaccination Cluster Head, Dr. Josephine Villafuerte gipahigayon na nila ang coordination meetings alang sa simultaneous rollout sa immunization activities uban sa tumong nga mapa-usbawan ang anti-Covid vaccination coverage ug sa samang higayon maapas ang napakyas nga mga routine vaccinations.
Sakop sa routine immunization ang mga bata nga bag-edad ug 0 – 12 months old ug ang 0-23 months alang sa catch-up vaccination o kadtong mga wala makahimo sa ilang routine vaccinations alang sa prevention sa polio, measles, mumps, rubella, tetanus, diphtheria, pertussis (whooping cough), hepatitis B, influenza, pneumonia ug uban pang mga sakit.
Sa pikas bahin, ang anti-Covid vaccination mosakop sa 5-11 age group, 12-17 age group, ug 18 years old pataas.
Dugang pa ni Villafuerte nga kinahanglan nila nga himuon ang expanded immunization program aron mapugngan ang outbreak sa ubang mga diseases.
Aron mapatuman ang simultaneous vaccination drive, mihimo na ang CHO ug barangay profiling aron masayran ang mga individuals nga wala nak-avail sa anti-Covid vaccination ug kadtong mga wala pa nabakunahan alang sa nahisgutang mga sakit.
