Nagpahinumdom bahin sa Rabies ang Davao City Health Office (CHO), pinaagi sa Animal Bite Treatment Center (ABTC), ngadto sa publiko nga ang rabies mamahimong makamatay apan mapugngan kung magpa-anti-rabies vaccine dayon.
Gihangyo ang mga residente nga magpa-konsulta og magpa-medisina kung makambrasan o mapaakan sa iro o iring, ug dayun nga panid-an ang hayop sulod sa 14 ka adlaw.
Nagpahimangno si Dr. Yleona Ysabel Camelotes, District Health Physician sa ABTC, nga importante ang saktong pag-atiman sa samad ug gihangyo usab niini nga undangon ang mga tradisyonal nga pamaagi susama sa “tandok” o pagbutang og ahos nga makapahugaw sumala pa sa samad.
Kinahanglan matud pa nga hugasan ang samad gamit ang sabon ug tubig sulod sa 10 hangtod 15 minutos, dayun nga e-disinfect gamit ang alkohol ug Betadine, ug dali nga magpa-konsulta sa ABTC.
Nagahatag ang ABTC og libre nga konsultasyon ug anti-rabies vaccination, apan adunay P300 nga bayad alang sa injection. Atong miaging tuig, nakatala ang ABTC og tabang sa 48,483 ka pasyente.
Ang siyudad sa Davao adunay siyam ka ABTCs, lakip na ang main office sa Magallanes Street ug mga satellite centers sa nagkadaiyang distrito.
Ang CHO usab nag-awhag sa mga tag-iya sa hayop nga ipa-vaccine kini kanunay ug likayan nga buhian sa kalsada aron malikayan ang risgo sa rabies.
