DAVAO CITY- Naglusad ug kalihukan ang City Health Office ning dakbayan sa Davao aron nga palig-unon ang anti-dengue campaign sa syudad.
Kini nga aktibidad ang nahisubay usab sa kasaulogan sa National Dengue Awareness Month niadtong Hunyo 25, 2024.
Ang maong kasaulugan ang gitambungan sa 300 ka mga myembro sa barangay’s Mosquito-Borne Diseases Task Force (MBDTF) gikan sa nagkadaiyang barangay kung diin anaa 34 ka baranggay sa syudad ang nagpaambit sa ilahang mga pamaagi sa pagpakgang sa lamok nga mohatod sa balatian nga dengue ingon man nga mihatag usab og pagtulun-an ang mga local ug national health and research institutions.
Tumong sa gipahigayon nga panagtigom mao ang pagpakusog sa partisipasyon sa komunidad aron nga mabatukan ang mga lamok nga mohatod sa sakit nga dengue pinaagi sa kanunay nga pagpanglimpyo sa palibot ug pagpahigayon sa fogging ilabi na sa matag alas kuatro sa hapon.
Dinhi sa dakbayan, una ng gibutyag sa City Health Office (CHO),nga mikunhod og 27% ang kaso sa dengue sukad niadtong Enero hangtod Hunyo ning kasamtangan nga tuig kung itandi sa susamang panahon niadtong 2023.
Sa karon padayon ang pag-awhag sa CHO ngadto sa katawhan nga batasanon ang pagpanghinlo sa mga palibot ug ipatuman ang 4’0 clock habit ug pagpahigayon sa Search and destroy sa mga butang nga posibling mapunduhan ug tubig nga mamahimong maitlugan sa mga lamok ilabi na karon nga panahon na sa ting-ulan.
