DAVAO CITY – Gipasalig sa ahensiya sa City Health Office (CHO) nga magpadayon pa gihapon ang ilang pagbakuna sa bata bisan nga naangkon na nila karon ang 102.65% nga immunization coverage pipila ka adlaw ayha matapos ang ikaduhang round sa Sabayang Patak Kontra Polio ugmang adlawa, Disyembre 7.
Una ng nasayran kang Dr. Julinda Acosta, technical division chief sa CHO, nga anaa lamang sa kapin 186,000 ka mga bata ang ilang target apan sukad nga gisugdan ang ikaduhang hugna sa bakuna kaniadtong Nobyembre 25 ug hangtud Disyembre 4 nakatala na sila ug 191,801.
Apan bisan nga milabaw na ang ihap, kinahanglan nga ipadayon pa gihapon nila ang pagbakuna hangtud sabado aron nga mas daghanang bata ang mabakunahan.
Gitataw sab ni Acosta nga aduna pa gihapoy mga ginikanan nga wala misugot nga pabakunahan ang ilang mga kini tungod sa ilang mga tinuohan.
