DAVAO CITY – Gitin-aw karon sa City Health Office sa dakbayan sa Dabaw nga wala pay nag-positibo sa polio virus sa dakbayan taliwala sa kompirmasyon nga adunay nakita nga polio virus sa tubig sa Davao River.
Gikanayon ni CHO Head Dr. Josephine Villafuerte, positibo ang migawas nga resulta sa gikuhang specimen sa Davao River niadtong September 9, 2019.
Tungod niini, paspas nga mipagawas ug advisory ang CHO sa tanang residente sa dakbayan ilabi na kadtong mga nagpuyo duol sa kadagatan ug kasapaan sa syudad.
Gikanayon sab sa Department of Health (DOH) nga angayang mag-amping ang katawhan sanglit wala pay nadiskubrehang tambal alang sa sakit nga polio.
Hinoon, mamahimo kining mapugngan pinaagi sa pagpabakuna ug Inactivated Polio Vaccine o IPV.
Ang nahisgutang bakuna ang ginahatag sa mga bata nga anaa sa 3 ka bulan ug tunga.
Pipila sa mga timailhan ug sintomas sa sakit nga polio mao ang kalintura, kakapoy, sakit sa ulo, pagsuka-suka, paghawoy sa mga kamot ug tiil ug stiff neck.
Ang mga bata nga nag-edad ug 5 anyos pa-ubos maoy nahimutang sa resgo nga magbaton ug Polio o Poliomyelitis – usaka sakit nga mo-igo sa nervous system.
Dugang sa CHO ug DOH nga mokatag ang maong virus pinaagi sa hugaw sa tawo.
