DAVAO CITY – Gipalagpot na sa pwesto ang hepe sa kapulisan sa Tagum city PNP gumikan sa kapakyas nga masulbad ug mapugngan ang nagpadayon nga pagpamatay sa nahisgutang syudad nga sumala pa adunay kalabutan sa investment scam.
Kini ang gibutyag ni Police Regional Office (PRO) eleven Regional Director Brig. Gen Marcelo Morales.
Sa pakighinabi sa Bombo Radyo, gikumpirma ni Gen. Morales nga gihulipan na si Lt. Col Philip Jefferson Ayban ni Lt. Col Ariel Acala isip hepe sa Tagum city Police Station duha ka semana na ang milabay atubangan sa halos matag adlaw nga pagpamatay sa Tagum City.
Gikatarungan ni General Morales nga buot niyang ipahimutang sa nahisgutang pwesto ang mas ‘capable’ ug ‘well experienced’ police officer aron ikapatuman ang mga security measures, lakip na ang anti-crime prevention program aron masiguro nga mababagan ang mga tawo nga nagplano sa pagsabwag ug krimen sa nahisgutang syudad.
Dungan niini, gimanduan usab ni Gen. Morales ang bag-ong hepe sa Tagum City nga mas pakusgan pa ang nagkadaiyang mga police operations sama sa Oplan Davao Kalinaw, paglusad ug mga manhunt operations batok sa mga wanted persons, pagpahimutang ug mga police checkpoint ug police visibility sa mga estratihikong lugar aron masumpo ang mga krimen nga posibling mahitabo.
