DAVAO CITY- Nagpabilin gihapon ang gilusad nga checkpoint karong adlawa atubangan sa Kingdom of Jesus Christ Compound (KOJC) national highway Catitipan, Buhangin Dist. ning dakbayan sa Davao.
Lakip na usab nga adunay gilusad sab nga checkpoint ang mga operatiba sa baranggay Tamayong kaganina lamang buntag nga bisan ang mga baranggay officials sa maong barangay dili matud pa kini paagihon.
Apan una nang gibutyag sa PRO-11 nga kabahin pa gihapon sa crime prevention ang gimuntar sa kapulisan sa nasampit nga dalan.
Kahinumduman nga una ng gireklamo sa mga myembro sa KOJC ni Pastor Quiboloy ang presensya sa mga kapulisan nga gilangkuban sa RMFB-11 ug SWAT team sa nasampit nga lugar.
Usa sa ilahang mga gireklamo ang pagdeploy sa mga otoridad nga wala sumala pa’y name plate nga makita sa ilahang uniform ug walay plaka sa sakyanan sa kapulisan sa atubangan nga bahin nga nakahatod sumala sa ilahang kabalaka.
Gidugang pa niini tungod sa checkpoint nga gimuntar, adunay nahitabo nga pagkadelatar sa byahe sa mga motorista.
Apan kining tanan nga mga reklamo ang gilimod sa otoridad, ilabi sa gikabutyag nga bug-at nga dagan sa trapiko nga sumala pa sa kapulisan, aduna sila’y nadawat nga reklamo sa mga drayber nga ang gipahigayon niini nga panagtapok sa mga tigsuporta sa nagtago-tago nga pastor maoy hinungdan sa bug-at nga dagan sa trapiko.
Una na usab nga gikwestyon ni First Dist. Councilor Tek Ocampo ang pagmuntar sa checkpoint sa maong lugar nga sumala pa sa nahisgutan nga tumong sa mga otoridad ang KOJC nga gipanag-iyahan ni Pastor Quiboloy.
