DAVAO CITY- Mopuli na sa katungdanan ang usa ka beterano sa 2017 Marawi siege isip labaw nga opisyal sa Armed Forces Eastern Mindanao Command (Eastmincom) nga si Major General Jose Maria Cuerpo II, nga kasamtangan nga commander sa 4th Infantry Division Philippine Army nga nakabase sa Cagayan de Oro.
Gipahigayon ang Change of command ceremony kagahapong adlawa sa Naval Station Felix Apolinario, Camp Panacan ning dakbayan sa Davao nga gitambungan sab ni outgoing EastMinCom Commander Lieutenant General Greg Almerol.
Nasayran nga si General Almerol ang niabot na sa iyahang mandatory retirement age nga 56-anyos nga una ng naghupot sa maong posisyon sukad niadtong Marso otso, 2021 ug nagpadayon kini human sa pagpatuman sa balaod nga RA 11939 mahitungod sa tour of duty sa key melitary officers.
Nasayran nga ang bag-ong Commander sa EASTMINCOM ang myembro sa Philippine Military Academy’s “Bigkis-Lahi” Class of 1990 ug lumad nga gikan sa Iligan City. Giila ang nahisgutan sa pakigbisog niini sa Dawlah Islamiyah-Maute Group, ang grupo nga nalambigit sa ISIS, dinhi sa Mindanao.
Samtang daghan sab ang mga nahimong kalampusan niini sa pagsumpo sa insurhensiya samtang labaw kini sa 4th ID Northern Mindanao ug Caraga region.
