DAVAO CITY – Padayon nga nakatutok ang buhatan sa City Disaster Risk Reduction and Management Office (CDRRMO) sa mga lugar sa dakbayan kini human nga halos walay undang ang pagbundak sa kusog nga ulan sa tibuok gabie hatud sa Low Pressure Area (LPA) nga namatikdan sa sidlakan nga bahin sa dakbayan sa Davao.
Gawas sa mga kasapaan nga sakop sa Davao region, kalakip sa gibantayan ang Lasang river ingon ang Davao, Lipadas ug Talomo river nga sagad sab nga bahaon panahon nga mobundak ang ulan.
Bisan tuod nga hinay ang nasinatian nga pag-ulan, apan kinahanglan pa gihapon nga mag-igmat sanglit mamahimo pa gihapon kini nga tinubdan sa mga pagbaha ug pagdahili sa yuta.
Una ng gibutyag sa PAG-ASA nga lauman pa ang masinatian nga La Niña hangtud sa Pebrero sa mosunod nga tuig.
Gipahimangnoan sab sa ahensiya ang mga mogawas nga magdala kanunay og proteksiyon sa kaugalingon sama sa payong ug coat samtang ang mga motorista kinahanglan nga hinay lamang ang pagpadagan aron malikayan ang disgrasya.
Una na sab nga nanawagan si CDRRMO head Alfredo Baluran sa mga residente nga nanimuyo sa delikadong lugar nga mas maayong mohikling na lamang ug dili na hulaton pa nga mabutang sa risgo ang kinabuhi ilabi na nga gitumbok karon sa bagyong Vicky ang Davao region.
Pahayag ni CDRRMO head Alfredo Baluran.
