DAVAO CITY- Nagpahimangno ang City Disaster Risk and Management Office kon CDRRMO nga dili gayud mag kumpyansa ilabi pa karong nagsunod-sunod na ang nabatiang pag-ulan ug pagbaha matag gabie.
Gipunting ni Lyndon Ancajas, Admin and Training Acting Division Head sa CDRRMO ilabi na kadtong mga nahimuyo sa mga flash flood prone areas nga mag-igmat gayud og magtan-aw sa palibot.
Matud pa niini nga og ugaling pahimangnuan nga magpahigayong og pre-emptive evacuation, motuman na lamang gayud aron malikay sa disgrasya.
Gani, kagabie lamang nakasinati na usab og pag-ulan ang daghang bahin sa dakbayan diin miresulta kini sa pagsaka sa lebel sa tubig sa mga kasapaan.
Ang maong nasinatiang pag-ulan ang mahitungod sa Intertropical Convergence Zone nga nagdala og hinay ngadto sa kusog nga pag-ulan.
Tungod sa kakusog sa pag-ulan nga nasinatian kagabie, miabot sa code red kon critical level ang Talomo River ug Lipadas River bandang alas 8:48 kagabie.
Mahitungod sa maong nasinatiang pagsaka sa lebel sa tubig sa kasapaan, sublig gi activate ang SAR TEAM sa pipila ka bahin sa dakbayan lakip na niana ang mga personahe gikan sa Davao City Police Office, 2nd CMFC, 3rd Platoon, Baguio Police Stations ug nagkadaiyang responders sa dakbayan.
Hinuon wala usab gikatahong naangol ingon man naanod tungod sa maong nasinatiang pagbaha.
