DAVAO CITY – Nagpagula karon ang Davao City Disaster and Risk Reduction Management Office (CDRRMO) ug Landslide Warning ngadto sa mga motorista nga naglawig sa Diversion Road gumikan kay delikado kini sa pagdahili sa yuta.
Sumala pa kang CDRRMO head Rodrigo Bustillo nga tungod sa nasinatian nga pag-ulan, laoman sumala pa ang landslides sa Diversion Road hinungdan nga kinahanglan magbinantayon ang mga motorista.
Kahinumduman nga adunay dyutay nga portion sa Diversion Road ang midahili kagahapong adlawa hinungdan nga gihangyo na nila ang nanag-iya sa area nga putlon na lamang ang gipangtanom nga mga lubi sa lugar.
Hinuon gipahigayon gilayon ang clearing operation sa lugar aron nga makuha ang nagkatag nga yuta.
Bisan nga adunay mitigating measures sa lugar apan wala pa gihapon nila gipadaplin ang posibilidad nga adunay laing landslide incident nga mahitabo sa lugar.
Sa kasamtangan, hugtanon ang gipahigayon nga monitoring sa CDDRMO sa mga landslide-prone areas sa Davao City ilabi na sa Guadalupe, Matina Crossing, Marilog ug uban pang bukiron nga bahin sa dakbayan.
