DAVAO CITY – Momugna ang Davao City Disaster Risk Reduction Management Office (CDRRMO) og task working group alang sa volcanic eruption risk assessment.
Sumala pa kang CDRRMO head Alfredo Baloran kinahanglan nila nga i-revisit ang volcanic eruption disaster and risk reduction plan sa siyudad human ang pagbusikad sa Taal Volcano nga nakaapekto sa liboan ka mga pamilya ug nakadaut og daghanang propedad ug imprastraktura.
Kahinumduman nga hangtud karon, padayon nga gimonitor sa Philippine Institute of Volcanology and Seismology (PHIVOLCS) ang aktibidad sa bulkan.
Wala gipadaplin ni Baloran ang posibilidad nga posibleng masinatian sab sa siyudad ang susama nga sitwasyon.
Una na sab nga gibutyag ni Public Safety and Security Command Center (PSSCC) head Angel Sumagaysay, nga gimandoan na matud pa ni Davao City Mayor Sara Duterte-Carpio ang CDRRMO nga makiglambigit sa PHIVOLCS sa pagpahigayon og extensive research kalabot sa posibilidad nga pagbusikad sa Mt. Apo.
Giila sumala pa ang Mt. Apo nga dormant o inactive volcano butang nga gibutyag ni PHIVOLCS executive director Renato Solidum nga taas sumala pa ang tyansa nga mubusikad.
Dakong bahad sab sumala pa sa pagbusikad ang Mt. Leonard Kniazeff, usa ka stratovolcano nga nahimutang tali sa munisipalidad sa Mabini ug Maco sa Davao de Oro.
Samtang gibutyag sab sa opisyal nga plano nila karon nga makiglambigit sa City Planning and Development Office aron nga masubay ang mga volcanic eruption evacuation areas.
