DAVAO CITY – Hugtanong gipahimangnoan sa Davao City Disaster and Risk Reduction Management Office (CDDRMO) ang mga opisyal sa Barangay kalabot sa ilang responsibilidad sa disaster preparedness and mitigation human ang nasinatian pagbaha ilabi na sa Talomo River.
Sumala pa kang CDRRMO operations officer Rodrigo Bustillo manubag gayud ang mga opisyal sa Barangay sa higayon nga adunay makalas nga kinabuhi panahon sa kalamidad ilabi na kung kulang ang ilang gihimo nga mga lakang aron nga maluwas ang mga residente.
Angayan sumala pa nga magsilbing frontliners ang mga barangay officials atol sa disasters ug uban pang emerhensiya.
Gitumbok sa opisyal ang 1991 Local Government Code ug Philippine Disaster Risk Reduction and Management Act of 2010 diin mandato ang mga local government units nga manguna sa pagpatuman ug mga lakang panahon sa emerhensiya sama sa pag-igo sa kalamidad.
Samtang gikanayon sab ni Bustillo nga ayha pa man misaka ang tubig baha sa patag partikular na sa Talomo river nasayod na matud pa sila niini gumikan sa sensor nga ilang gipahimutang sa bukiron nga bahin sa dakbayan. Apan luyo sa ilang pahimangno, pipila ka mga residente ang nagmagahi pa gihapon sa paghikling.
