DAVAO CITY – Patay na nga nakita sa iyaan ang pag-umangkon niini nga usa ka CAFGU human nga gikulata sa duha ka mga batan-on.
Pasado alas singko kagahapon sa buntag dihang nakita na lamang nga wala nay kinabuhi sulod sa ilang panimalay sa Prk 3A, Sitio Darila, Brgy.Lamanan, Calinan ning dakbayan sa Davao ang biktima.
Naila ang nahisgutan nga si Jason Tulabing, 26 anyos ug residente sa nasampit nga lugar ug sakop sa 89th IB, 10ID.
Sumala pa sa iyaan sa biktima nga iya na lamang nakita ang iyang pag-umangkon nga wala nay kinabuhi nga nagbukot og habol sa ulo ug daghang bun-og sa nawong nga agi sa pagkulata.
Sa gihimong follow-up operation sa mga barangay tanod, nadakpan ang duha ka mga suspek diin ang usa 19 anyos nga si MIRELLE ROQUES ug si alyas JOHNNY nga 15 anyos.
Sa imbestigasyon sa mga kapulisan nasayran nga niadtong petsa 4 sa hapon, hubog na ang biktima ug sumala pa nihangyo kini nga magpahatod sa motor sa mga suspek apan gibalibaran kini ug didto na natigayon ang pagpangulata.
