DAVAO CITY – Gikanayon sa Davao City Chamber of Commerce and Industry Inc. (DCCCII) nga natunga pa gihapon karon ang business sector kalabot sa gipatuman nga Martial Law sa Mindanao nga matapos na karong bulan sa Disyembre.
Sumala pa kang DCCCII president John Tria, nga adunay pipila ka mga miyembro sa business sector nga uyon nga ipabilin ang Martial Law kini tungod sa maayong seguridad ug business opportunity alang sa ekonomiya sa Mindanao.
Partikular nga miuyon kadtong anaa sa Banana Industry kini tungod mas hugtanon sumala pa ang pagpatuman sa seguridad.
Dakong tabang sumala pa ang pagpatuman niini sa mga dagkong kompanya aron nga makasiguro sila sa ilang operasyon ilabi na kadtong nahimutang sa mga hilit nga lugar.
Hinuon dili tanan nga mga negosyante ang uyon gumikan kay mamahimong tinubdan sumala pa kini sa kahadlok ug walay mobubo sa ilang puhunan dinhi sa Mindanao.
Apan luyo niini, gitataw ni Tria nga bisan gipatuman ang balaud militar, naka-imbita pa gihapon sila sa mga dagkong kompanya ug traders nga mag-invest sa dakbayan.
Kahinumduman nga sayo ning kasamtangan nga tuig, mi-apela ang dakbayan sa Davao ngadto kang Pangulong Rodrigo Duterte nga dili na ilakip ang Davao sa Mindanao-wide Martial Law gumikan kay mohatud kini og dili maayong impact sa turismo ug investments.
