Nabalintong ang usa ka pampasaherong bus sa Barangay Iba, San Isidro, Davao Oriental kagahapon sa buntag samtang nagbiyahe padulong sa Davao City.
Nasayran nga gikan sa dakbayan sa Mati ang Bachelor Bus nga karga ang mga pasahero nga nakaangkon usab og bun-og ug pi-ang sa ilahang kalawasan atol sa maong panghitabo.
Subay sa inisyal nga report sa kapulisan, posible nga nawadan ug kontrol ang drayber sa bus samtang nagmaneho sa bungtod ug danlog nga bahin sa karsada.
Gumikan niini, nabalintong ang bus ug daghang pasahero ang naangol.
Giulayon usab nga girespondehan sa mga personahe gikan sa MDRRMO San Isidro, kapulisan, ug mga residente sa lugar aron matabangan ang mga biktima.
Ang mga nasamdan nga pasahero gidala sa San Isidro District Hospital ug sa Davao Oriental Provincial Medical Center sa dakibayan sa Mati.
Sa pagkakaron, ginasubay na sa mga otoridad ang posibling hinungdan sa disgrasya nga gikaangol sa mga pasahero. Ginalantaw karon ang posibilidad nga mechanical failure o human error ang hinungdan niini.
Tungod sa maong panghitabo, nagpahimangno karon ang mga otoridad sa mga drayber nga likayan ang pagpakusog sa dagan sa mga sakyanan og mag-amping pagmaneho sa mga kadalanan, ilabi na karon nga panahon na sa ting-ulan.
