Gipaamping sa Bureau of Animal Industry (BAI) ang mga namaligya ug karne sa baboy sa mga palengke, gumikan pa gihapon sa pagdaghan sa kaso sa African Swine Fever (ASF).
Gipahinumdum sa BAI – National ASF Prevention and Control Program sa mga namaligya nga gikinahanglang ang mga karne ang adunay Meat Inspection Certificate(MIC) o Certificate of Meat Inspection(COMI) lamang ang ibaligya sa mga konsumante.
Matod pa sa BAI, sa ingon niining pamaagi, maseguro nga limpyo ang karneng gibaligya ug mi-agi sa nagkadaiyang sunod-sunod nga inspeksyon gikan sa mga government authorities.
Ang mga karne nga walay certificate ang matawag nga hot meat gumikan kay wala mi-agi sa insaktong proseso.
Ang mga nagbaligya sa ingon niining matang sa karne ang pamultahon ug mukabat sa P500,000 subay sa balaod.
Pahinumdum pa sa ahensya, ang mga konsumante ug nagbaligya ang magtinabangay aron mapugngan ang pagkuyanap sa ASF sa nasud.
