DAVAO CITY – Andam sumala pa si Kagawad Emen Ototan sa Barangay Mandug ning dakbayan nga atubangon ang mga alegasyon nga gipasangil batok kaniya partikular ang gikanayong pagpahimas ug paghalok niya sa usa ka OFW nga si alyas Miles.
Sama sa iyang nauna nga pahayag, usa lamang sumala pa ka political harassment ang gipasangil batok kaniya ug andam siya nga atubangon kini.
Dili sab matud pa niya mabuhat ang maong alegasyon gumikan kay adunay mga pulis sa lugar ug aduna sumala pa siyay kahadlok sa iyang pamilya.
Samtang sa bahin sab sa isyu nga gikuhaan niya og susi ang igsuon ni Alyas Miles, usa sumala pa kini ka bakak ug gibarugan nga rescue ang ilang gihimo sanglit mismong ang mga Barangay tanud na ang nangayo kaniya og pakitabang gumikan sa mga trisikad nga illegal nga nagapamasada sa highway.
Atol sumala pa sa iyang pag-responde, nakita niini ang minor de edad nga nagmaneho og tricycle hinungdan nga iya kining gisita.
Gikanayong dili lamang sumala pa kini ang unang higayon nga nagapahigayon sila og operasyon batok sa mga illegal nga nagapamasada sa ilang kadalanan.
Gitataw sab ni Kagawad Ototan nga gidala niya ang trisikad sa reklamante sa ilang Barangay for “safekeeping” ug wala niya kini gisibat.
