DAVAO CITY – Pabilin karon nga alerto ang ahensiya sa Bureau of Animal Industry ug Bureau of Customs (BOC) Davao sa pagmonitor sa mga kargamento sa mga pantalan ning dakbayan aron nga masiguro dili makasulod ang mga produkto nga gikan sa nasod nga mga apektado sa African Swine Fever (ASF).
Kahinumduman nga doble ang pagbantay sa nahisgutan nga ahensiya kini human nga nadungagan sumala pa ang mga nasod nga apektado sa ASF.
Sumala pa kang Dr. Maria Teresa Bacayo, regional Veterinary Quarantine Office, VQS 11, pangitaan una nila nga mga rekisitos ang mga importer sama sa Veterinary import clearance ug subayon kung asa ang point of origin sa mga isulod nga produkto partikular na ang mga karne aron nga masayran kung naggikan kini sa nasod nga kalakip sa listahan nga apektado sa ASF.
Gitataw sab sa opisyal nga mopailalom sab sa aktwal nga inspeksiyon ang mga container van nga isulod sa mga pantalan sa dakbayan.
Kalakip sab sumala pa sa mga bantayan karon sa ahensiya kadtong mga pasahero nga gikan sa laing nasod nga nagdala ug mga produkto nga karne.
