DAVAO DEL NORTE- Gikabalak-an sa lokal nga panggamhanan sa Island Garden City of Samal nga posibleng mulungtad pa hangtod Hunyo sa sunod nga tuig ang pagpailawom sa state of calamity gumikan gihapon sa problema sa suplay sa kuryente sa maong Isla.
Kini ang nahimong pamahayag atol sa gihimong press conferrence kaganihang buntag nga sumala ni Igacos Mayor Al David Uy, hangtod karon nagpabilin gihapon ang dakong problema sa nasinati-an nga power interuption sa ilahang syudad.
Apan gikanayon sab niini nga sa karon ang LGU adunay mga gihimong lakang kabahin sa maong problema ug sumala pa niini nga ilahang gigamit ang pundo sa Local Disaster Risk Reduction and Management Fund.
Kahinumduman nga niadtong Mayo sa miaging tuig gideklara ang state of calamity sa isla gumikan sa kadako nga problema sa suplay sa kuryente hangtod niadtong Pebrero ning kasamtangang tuig ug gilugwayan kini hangtod sa bulan sa Marso.
Ning kasamtangan nakadepende pa gihapon sa usa ka modular generator set ang LGU kung adunay masinatian nga power interruption sa Northern Davao Electric Cooperative.
Kahinumduman nga usa ang IGACOS sa nisuporta sa planong pagpuli sa Nordeco sa pag-supply ug kuryente sa tibuok probinsya.
