Gipahayag sa Bureau of Internal Revenue (BIR) nga gihatagan na nila og go-signal ang pagsugod sa tax audit sa siyam ka negosyo nga gi-ila nga may kalabotan kang Vice President Sara Duterte ug sa iyang bana nga si Atty. Manases Carpio.
Sumala sa BIR, nag-isyu na kini og Letters of Authority (LOA) human makakita og igo nga basehan sa paghimo og pormal nga imbestigasyon. Lakip niini ang pagsuta sa book of accounts ug uban pang financial records sa maong mga kompanya.
Ang mga negosyong sakop sa audit mao ang: Carpio Lawyers (kaniadto Carpio & Duterte Lawyers), Zelta Matiem Salon, City Hall King Chow Foods Corporation, Davao Bounty Times Foods Corporation, Madayaw Fisheries Inc., Davao Emerging Taipans Corporation, Amianan Shores, Inc., Cale88 Foods Corporation, ug Geometry Security and Investigation Agency, Inc.
Gipaklaro ni BIR Commissioner Charlito Mendoza nga ang LOA wala magpasabot nga gilayon nga adunay kasaypanan mga kompanya o indibidwal.
Kini usa lamang ka legal nga lakang aron matino ang saktong buhis nga angay bayran.
Gidugang pa niya nga obligasyon sa BIR ang pag-imbestiga kung adunay makita nga basehan, ug kung mapamatud-an ang paglapas, mahimong moresulta kini sa sibil, administratibo, o kriminal nga kaso.
Gibutyag usab sa BIR nga ang maong lakang kabahin sa third-party information, lakip ang datos gikan sa pampublikong rekord, mga report sa Office of the Ombudsman, ug impormasyon gikan sa Anti-Money Laundering Council nga migawas sa impeachment hearings sa Kamara.
Gikanayon sa ahensya nga ang tumong sa audit mao ang pagsiguro sa husto nga koleksyon sa buhis, samtang ginasunod ang balaod ug girespeto ang katungod sa mga ginapailawom sa imbestigasyon.
