Mga Higala Komusta Ug Maayong Buntag!
Matag panahon sa mga kalihukan sa atong komunidad o ilabi na diha sa simbahan dili gyud mawala sa atong kultura ug tradisyon ang pag-andam ug mga pagkaon sa mga lamisa nga haom sa usa ka selebrasyon o okasyon. Sama ning panahon sa Semana Santa nga bisan ug dunay ginahimong pagpuasa sa mga kadaghanan nga mga tumutuong katoliko dili gyud mapugngan ang kabahin na sa kasaysayan ang pagkaon nga gikan sa kabisay-an kining gitawag nga “Binignit” ning panahon sa paghinuklog sa atong mga kaugalingon.
Ning kasamtangang panahon wala man gyud siguro’y tawo nga wala gyud makaila sa lamian nga pagkaon nga bisan ug dili panahon sa Semana Santa, makita man kini bisan asa nga kabahin sa mga gitinda kay lami man kini ipang-meryenda. Labaw na kung kumplito sa sagol ang imung pagalutoon, nga gilangkuban sa tuno o gata sa lubi, gabi, kamote, mahimo pud nga sagulan ug ube, saging, garnaba o sab-a, landang o sago, o aron gyud nga makompleto ug lami ang resulta sa Binignit, sagulan ug nangka o dili kaha banilya o vanilla aron dunay aroma. Pero sa tanang sagol nga akong gikabiliban kining landang nga hilabihan ang prosesong giagian.
Ug kini ang mokumplito sa imung Holy Week kung atong hisgutan ang mga pagkaon nga wala gidili sa simbahan panahon sa atong pagtamod sa pagpasakit sa atong labaw’ng makagagahom. Kay panahon sa kwaresma ilabi na sa Semana Santa kung mahimo atong likayan ang mga pagkaon nga sama sa atong naandan nga silbing maghatag ug dalan alang sa mga katawhan nga buot mahimong walay kakulian ang iyahang paghatag ug panahon alang sa pag-ampo, paghinuklog, ug labaw sa tanan paghinulsol sa mga nahimong kasaypanan kay kita tawo lang man ug dunay kakulangan.
Apan ning panahon nga kita naapektuhan gumikan sa huwaw kon hilabihan nga init, dili gyud malikayan nga maapektuhan pud ang mga sagol sa pagbuhat ug Binignit. Dunay mga sagol sama sa saging nga gamay ug unod, gabi nga wala makapalabi sa pagdako kay dili man kini magsilbi panahon sa ting-init.Ug kini muresulta sa pagkulang sa mga baligya sa mga tindahan. Mao na nga ning panahuna, kita sab naapektuhan sa pagsaka sa presyo, gawas nga in-demand ang maong pagkaon, sigurado man gyud nga munihit ang supply karon. Pero pasalamat nalang pud ta sa mga mag-uuma nga padayon sa pagtanom sa mga lagutmon nga mulahutay panahon sa ting-init, kay aron duna kitay kaunon ning panahon sa Semana Santa.
Ning panahuna gawas sa pagkaon, angay sab nga dili nato kalimtan ang tinuod nga kahulugan sa pagtamod sa panahon nga kita giluwas sa atong mga kasaypanan pinaagi sa pagpalansang sa krus ni Ginoong Hesu Kristo, kay sa pagkatinuod dili lang kita kinahanglan nga mabusog sa pagkaon nga kalibutanon kondili atong ilakip ang pagkaon nga Espirituhanon alang sa kinabuhing dayon.
