DAVAO CITY – Napalgang nagbuy-od sa kayutaan ang patayng lawas sa usa ka lalaki bandang alas-6:30 sa buntag, adlawng Lunes, sa Purok 12, Brgy San Vicente, Santo Tomas, Davao del Norte.
Sumala sa Sto. Tomas PNP, giila ang patayng lawas nga si Ruel Mandigal Lamprea alyas Longlong, 45 anyos, – Purok Mahayahay, Brgy. Cabay-angan, Braulio E. Dujali, Davao Del Norte.
Subay sa taho, nadiskubrehan sa usa ka Jonathan Villa nga taga Purok 12 sa maong Barangay ang patayng lawas sa biktima.
Matud pa, samtang nanguha siya sa inani nga bugas kon subing sa iyang asawa niadtong tungura, didto niya nakita ang biktima nga nagbuy-od sa yuta.
Nakaangkon ang biktima og mga samad dinunggaban sa lain-laing parte sa iyang lawas ilabina sa dughan, ibabaw nga bahin sa tuong paa, tuo nga bahin sa likod ug tuong bahin sa paa nga posibleng maoy hinungdan sa iyang kamatayon.
Adunay siyam ka pulgada nga kutsilyo ang nakuha gikan sa crime scene.
Sa inisyal nga imbestigasyon nga gihimo, alas 8:00 sa gabii niadtong Nobyembre 12, adlawng Dominggo, nangayo og kwarta sa iyang igsuon aron motan-aw kini og live band ug disco sa Brgy Salvacion, Sto. Tomas, Davao del Norte.
Dugang nasayran gikan sa mga direktang kabanay sa biktima nga usa ka bisexual si Ruel ug kanunay kining moadto sa Brgy Salvacion, Sto. Tomas, aron bisitahon ang pipila niya ka mga higala.
Sa pagkakaron, padayon pang ginasuta sa kapulisan ang motibo ug mga responsable sa kamatayon sa biktima.
