DAVAO CITY – Lauman nga masugdan karong tuiga ang maintenance ug upgrading sa Metropolitan Bike Lane Network sa tibuok Davao City gumikan sa namaikdang pagkaguba niini sulod sa duha ka tuig.
Sumala pa ni DPWH 11 Spokesperson Dean Ortiz, gikatakadang masugdan ang maintenance ug upgrading sa mga bike lanes sa syudad aron masigurong duna gihapo’y luwas nga agianan alang sa mga bikers sa dakbayan.
Dugang pa nga gawas sa refurbishing sa mga bike lanes, madungagan sab ang mga agianan alang sa mga siklista.
Kahinumduman nga namugna ang maong agianan pinaagi sa pakigtambayayong sa DPWH 11 ug DOTR ang 54.51 kilometers nga road network nga nagkonekta sa 14 ka mga sections sa mga kadalanan sa dakbayan.
Mukabat sa P282 million ang pondo nga igahin alang sa pag-ayo sa mga nangaguba ug nangawala nga bahin sa maong dalan.
Gawas sa rehabilitasyon sa mga bike lanes sa Davao City, sunod nga pagabuhaton ang mga bike lanes sa Tagum City, Davao del Norte nga dunay gilay-on nga 15 kilometros.
via || Bombo LJF
