Limitahan na sa Bureau of Immigration (BI) ang paggamit sa mga mobile phone sa mga langyaw nga detenado, ug ibalik na lamang sa ahensya ang paggamit sa landline phones ingon man ang pagtukod og mga video call booths.
Gipagawas ang maong lakang human sa gihimong pagbulabog sa Russian vlogger nga si Vitaly Zdorovetskiy nga nanuhol kini og mga guwardiya aron makashoot og vlog ug makagamit og mobile device samtang siya ang gidetine.
Sumala kang BI spokesperson Dana Sandoval, ilisan na sa landline phones ang mga mobile device aron mas mabantayan ang komunikasyon sa mga detenado ug malikayan ang sayop o abusong paggamit sama sa nahitabo sa Russian vlogger.
Ibutang usab ang mga video calling booths aron mapanid-an kung husto ba ang paggamit sa mga foreign detainees sa maong linya sa komunikasyon.
Subay sa inisyal nga imbestigasyon sa BI, ang mobile device nakasulod sa pasilidad pinaagi kuno sa tabang sa usa ka Filipina nga asawa sa usa usab ka detainee sa BI.
Sumala pa sa BI, dili lamang basta ipalabay na lamang ang maong isyu tungod adunay pipila ka mga detenado nga kuno nag-abusar sa ilahang kagawasan sulod sa pasilidad.
Samtang kabahin niini, gidawat na sa Malacañang ang courtesy resignation sa warden sa Bureau of Immigration Warden Facility, samtang duha ka deputy wardens ug tulo ka mga empleyado usab ang gitangtang sa ilahang mga katungdanan.
