DAVAO CITY – Sumala sa pinakabag-ong datos sa 10th Infantry Division gikan Enero hangtod ning bulana sa kasamtangang tuig, anaa sa 24 ang ihap sa mga mitahan nga mga rebelde diin 19 niini ang mga regular nga myembro sa NPA ug 5 ang myembro sa Milisyang Bayan.
Samtang nasurrender ngadto kanila ang anaa sa 19 ka mga armas nga gilangkuban sa 9 ka mga high powered ug 10 ka low powered nga mga armas.
Sa kahimtang sa mga mitahan nga kanhi rebelde, gipasalig ni Major Mark Anthony Tito, ang tigpamaba sa 10ID, atol sa ekslusibong pakighinabi sa Bombo Radyo Davao, lauman gihapon ang pagdawat sa mga kanhi rebelde og katugbang nga mga hinabang pinaagi sa Enhanced Comprehensive Local Integration Program kon E-CLIP.
Kini human sa mga nadawat nga reklamo gikan mismo sa pipila ka mga former rebels nga wala nakadawat sa ilahang financial assistance.
Gipaklaro sab ni Major Tito nga ginaproseso pa ning kasamtangan ang ubang mga makadawat sa nasangpit nga hinabang kauban ang DSWD 11 ug ubang ahenya. Hinuon, duna gihapon mga LGUs sa rehiyon nga naghatag og localized E-CLIP alang sa mga mitahan nga mga kanhi rebelde sa ilahang lokalidad nga dunay susama nga hinabang alang kanila.
Subay sa datos nga gipagula sukad sa pagsugod sa maong programa sa rehiyon, anaa sa 1,766 ka mga rebelde ang natunolan og P15,000 financial assistance; samtang 1,145 ang nahatagan og P50,000 livelihood assitance; ug 69 ka mga armas ang na-surendder bugti sa kwarta alang sa firearms reenumeration.
Dugang pa sa opisyal, tumong sa E-CLIP nga matabangan ang mga former rebels nga mobarog sa ilang kaugalingon human sa pagtahan sa gobyerno alang sa hingpit nga pagbalik niini sa pagka-sibilyan pinaagi sa walay hunong nga suporta nga itunol alang kanila.
via || Bombo LJF
