DAVAO REGION- Hilabihan ang gibating kalipay ug pagpasalamat sa mga benepisyaryo sa Special Program for Employment of Students (SPES) sa pagtapos sa ilahang summer job atol sa culmination ceremony sa Casa Blanca, sa Mati City sa miaging adlaw.
Gilangkuban sa 210 ka mga SPES beneficiaries ang nigradwar ning tuiga nga gitakdang makadawat kini ug P13,000.
Matag usa isip sweldo sa 22 ka mga adlaw nga pagpanarbaho sa nagkadaiyang buhatan sa Probinsyal nga panggamhanan sa Davao Oriental.
Ang SPES program nagmalampuson sa pakigtambayayong ni Gov. Uy kauban ang Department of Labor and Employment (DOLE) sa probinsya nga gipanguluhan ni DOLE Provincial Head Rodolfo T. Castro, pinaagi ni Provincial PESO Manager Restie Aguilon ubos sa Career Development Services Division sa Public Employment Service Office (PESO) Davao Oriental.
Tumong sa nasampit nga programa ang pagtabang sa pinansyal nga panginahanglanon sa mga estudyante alang sa ilahang pagtungha sa umaabot nga klase samtang anaa pa kini sa pagpahulay sa klase karong panahuna.
Ang culmination program inubanan sa temang “SPES 2024 Tropical Splash,” dili lang usa ka recognition ceremony kondili usa usab kini ka selebrasyon sa pagsaulog sa mga talento, kalingawanm atol sa summer job program sa Lokal nga Panggamhanan sa Probinsya.
