DAVAO CITY – Gikataho sa San Pedro Police nga naplagan na ang 2 weeks old nga bata nga gikatahong gikawat sa usa ka wa mailhing babaye sa may Centennial Park, San Pedro St., Davao City niadtong Pebrero 17.
Sumala sa pulisya, nakit-an ang maong bata sa Bankerohan nga gibilin sa wa mailhing tawo. Subay sa taho sa San Pedro Police, nakit-an sa duha ka tawo nga giilang sila Ira Bayo Mojado ug Jasper Abi-Abi Aton ang maong bata dihang namatikdan ang paglihok sa lampin ug diha na nakit-an ang maong bata.
Sa pagkakaron, nauli na ang bata sa iyang ginikanan human sa pipila kaadlaw nga pagkawala niini.
Kahimumduman nga nag-viral sa social media ang panawagan sa inahan sa masuso nga bata human kini gidagit sa wa mailhing suspetsado human sa pagpa-new born screening sa SPMC niadtong adlawa.
Sumala pa sa inahan nga si Jessa Mar Cumbalay, usa ka wa maihing babaye ang nagduol kaniya ug gipananghiran nga ibilin ang baby aron mupalit og tubig.
Sa dihang pagbalik niini sa Centennial Park, nawala na ang bata.
Wala pa matino ang identity sa maong babaye nga nagkawat sa bata apan sa pagkakaron, dagkong pasalamat sa inahan nga nabalik nga luwas na ang iyang anak.
Nadala pag-usab sa SPMC ang maong bata aron ma-check up.
Nagpadayon gihapon ang imbestigasyon sa kapulisan aron matudlo ang nagkawat sa bata.
