Gikumpirma ni Commission on Elections (COMELEC) Chairman George Erwin Garcia nga si Sebastian “Baste” Duterte ang mopuli nga acting mayor sa Davao City human wala makapanumpa si Mayor-elect Rodrigo Duterte tungod kay kasamtangang nakakulong kini sa International Criminal Court (ICC) sa The Hague, Netherlands.
Matod pa ni Garcia, ang Department of the Interior and Local Government (DILG) na ang magbuot sa lakang kung dili gayud makapahimutang sa posisyon si Duterte.
Base sa Local Government Code, kung ang mayor-elect dili makapanumpa, awtomatikong ang vice mayor ang mopuli isip acting mayor.
Dugang ni Garcia nga sugod sa Hunyo 30, mawagtangan na og hurisdiksyon ang COMELEC sa mga nahimong napiling opisyal gawas kon dunay nakabinbing kaso sa ilang buhatan.
Bisan pa sa kasamtangang pagkabilanggo ni Rodrigo Duterte tungod sa mga kasong kalabot sa war on drugs, nakadaog kini sa pagka-alkalde sa Davao City pinaagi sa landslide nga labaw og kapin 600,000 ka boto.
