DAVAO CITY – Balhog karon sa prisohan ang duha ka indibidwal human nga nadakpan atol sa gipahigayong buy-bust operation sa Purok 6, Sitio Kaimito, Barangay Miranda, Samal District, IGACOS.
Subay sa rekord sa kapulisan, nailhan ang mga suspek nga sila alyas Caloy, 23 anyos, ulitawo, usa ka barbecue vendor ug si alyas Luca, 28 anyos , ulitawo, usa ka mekaniko ug susamang nagpuyo sa nahisgutang dapit.
Nakuha sa posisyon sa mga dinakpan ang usa ka sachet sa gituohang shabu nga adunay gimbug-aton nga .2 grams ug kantidad nga P1,000 pesos; usa ka sachet sa pinaugang dahon sa marijuana nga muabot sa 2.2 grams ang gimbug-aton ug kantidad nga P240 ug usa ka 500 pesos nga marked money.
Sa pagkakaron, napasakahan na og tukmang kaso ang mga dinakpan diin mag-atubang kini sa kasong paglapas sa RA 9165 kon Comprehensive Drugs Act of 2002.
Samtang, nagpahimangno usab ang kapulisan nga undangon na ang mga iligal nga binuhatan ilabi na sa mga tigpayuhot og illegal nga droga tungod prisohan gayud ang ilang tugpahan.
Via || Bombo Danica Baguio
