DAVAO CITY – Gisubay na karun sa mga kapulisan sa Mati City ang posibleng motibo sa pagpusil patay sa usa ka Barangay Kapitan sa Matiao sakop sa nahisgutan nga lalawigan.
Kahinumduman nga kabsan gilayon sa iyang kinabuhi ang biktima nga nailang si Ronie Palma Gil Valera, 57 anyos.
Sa inisyal nga report, aduna sumala pay tulo ka mga wala mailhing lalaki ang misulod sa balay sa kapitan nga mi-agi sa likod nga bahin.
Nagpahulay sumala pa niadtong tungura ang biktima sa iyang duyan dihang gipusil kini sa mga suspek sulod sa pipila ka higayon.
Gilayon nga miresponde sa lugar ang mga sakop sa Mati Police Station dihang nadawat ang impormasyon human ang insidente. Nakaangkon ug samad pinusilan sa iyang ulo ang kapitan ingon man duruha sa dughan niini.
Dali pa nga gidala sa balay tambalanan ang biktima apan gideklara kining dead on arrival sa mga doktor.
Subayon karon sa kapulisan ang mga posibleng nakabangi sa biktima ug uban pang anggulo sa krimen aron nga dali nga mailhan ang suspetsado.
