DAVAO CITY – Positibo ang opisyal sa Bantay Hayop Davao (BHD) nga ang sugyot nga magdili sa pagpagawas sa mga iro sa mga kadalanan ang makapalig-on sa pagbatok sa pagkatag sa rabies.
Makatabang sab sumala pa ang proposal aron nga mapugngan ang pagsaka sa populasyon sa mga latagaw nga pipila ka tuig na nga suliran sa dakbayan.
Kahinumduman nga gipalabang na sa ikaduhang pagbasa sa konseho ning siyudad ang Ordinance No. 1457, Series Of 1974, o “An Ordinance Prohibiting The Loosening Or Letting Stray of Dogs In The City Of Davao”.
Sumala pa kang Rovie Bullina, program director sa BHD, dili sama sa iro kung naglatagaw kini sa kadalanan ug gi-abandona inay nga mga tawo sumala pa nga nagpasagad ug i-responsable.
Dugang sa nahisgutan nga kung mapalabang na ang Ordinance No. 1457, kinahanglan nga ipatuman gilayon kini.
Subay sa Section 7 sa ordinansa, ang mga iro, baka, kabaw ug mga kanding ang makonsidera nga latagaw kung pasagdan kini sa nanag-iya ug makita na lamang sa mga kadalanan, plazas, markets, school premises, ug uban pang pampublikong lugar.
Subay sa Republic Act No. 9482 sa “Anti-Rabies Act of 2007” ang mosunod nga mga penalties ang ipahamtang, P2,000.00 sa mga pet owners nga pakyas sa pagparehistro o magpabakuna sa ilahang hayop; P10,000 sa mga mubalibad nga obserbahan ang ilang iro sa higayon nga makapaak kini; P25,000 sa pet owners nga mubalibad nga mu-abaga sa medical expenses nga napaakan nga tawo; P500 sa dog owners nga mubalibad paghigot sa iro; P5,000 sa matag iro kung mapamatud-an nga gibaligya kini arun nga ihawon uban ang usa ngadto na sa upat ka tuig nga pagkabilanggo; ug P 5,000 per act ug pagkabilanggo ug usa ngadto na sa upat ka tuig kung mapamatud-an nga gikuryente niini ang iro isip pamaagi sa euthanasia.
