DAVAO CITY – Laoman nga mas mapahugtan pa ang paghiling sa mga pasahero nga mosulod sa Davao City Overland Transport Terminal (DCOTT) kini human nga hingpit na nga gimuntar ang baggage scanner sa entrada nga bahin.
Tumong ug tuyo sa pagpahimutang sa maong pasilidad nga dili makalusot ang mga kontrabando sa terminal ilabi na nga kanunay dagsa ang mga pasahero sa lugar.
Sumala pa kang DCOTT managero Aisa Yusop nga namatikdan nila ang ubay-ubay nga pasahero nga mosulod sa terminal karong panahon bisan nga dili peak season hinungdan nga dakong tabang ang baggage scanner aron nga dili matanggong ang mga pasahero sa entranda nga bahin gumikan sa gipatuman nga inspeksiyon.
Samtang gitino sab ni Col. Consolito Yecla, commander sa Task Force Davao (TFD) nga magpabilin pa gihapon ang ilang mga personahe sa DCOTT ug posibleng ang uban niini ang ibalhin sa exit point bisan pa man nga dako na ang matabang sa gipahimutang nga baggage scanner.
