Mipahigayon ang 1001st Infantry (Pag-asa) Brigade, ubos sa liderato ni Brigadier General Vince James D. Bantilan, og Amnesty Intake Process alang sa mga Former Rebels (FRs) sa hugot nga pakigtambayayong sa National Amnesty Commission (NAC) pinaagi sa Local Amnesty Board (LAB).
Gipahigayon kini sa Brigade Headquarters sa dakbayan sa Mati, probinsya sa Davao Oriental. Gipakita sa maong inisyatiba ang padayon nga kolaborasyon tali sa Philippine Army ug mga importanteng sibilyang ahensya sa pagpalambo sa people-centered nga pamaagi sa peacebuilding, pakig-uli, ug pagbag-o sa mga panagbangi sulod sa area of responsibility (AOR) sa brigada, isip suporta sa peace and reconciliation agenda sa gobyerno.
Sa diskusyon uban sa LAB-Davao team, gipasiugda ni Brig. Gen. Bantilan nga ang proseso sa amnestiya dili lamang administratibo kundili transformational, tungod kay naghatag kini og bag-ong kahigayonan sa mga kanhing rebelde nga tukuron pag-usab ang ilang kinabuhi ug makig-uli sa ilang pamilya ug komunidad ubos sa panalipod sa balaod.
Ang amnesty intake gipangunahan sa Local Amnesty Board–Davao nga gipangulohan ni Crisostomo M. Gaerlan, Peace Program Officer III. Aron masiguro ang integridad, transparency, ug episyente nga legal nga proseso, duha (2) ka abogado gikan sa Public Attorney’s Office sa Mati City ang mihatag og legal assistance ug mipadali sa notarization sa mga dokumento sa amnestiya.
Pinaagi sa sistematikong dokumentasyon, vetting procedures, ug suod nga koordinasyon sa mga operational control (OPCON) units sa 1001st Infantry Brigade, mokabat sa 187 ka kwalipikadong former rebels gikan sa Davao de Oro ug Davao Oriental ang pormal nga nakaplay og aplikasyon alang sa amnestiya.
Ang ilang mga aplikasyon nagtimaan og dakong lakang padulong sa pagpasig-uli sa ilang civil ug political rights, pagsulbad sa mga kaso nga may kalabotan sa panagbangi, ug sa ilang mahinungdanong reintegration ngadto sa mainstream nga katilingban isip produktibong mga lungsuranon.
