DAVAO CITY – Plano karon sa Aboitiz Power Corporation nga palapdan ang kinatibuk-ang generation capacity niini ngadto sa 9,200 mw (megawatt) hangtod sa katapusang dekada diin katunga niini magagikan sa renewable energy.
Tungod niini, ginalantaw nga usa ka dakong tabang ang pagtukod sa bag-ong digital substation nga nahimutang sa Binugao,Toril ning siyudad aron makahatag og episyente ug kasaligan nga suplay sa kuryente ngadto sa mga konsumante ilabi na sa habagatang bahin sa siyudad.
Subay niini, gikatakda usab nga magtukod og duha ka mga bag-ong digital substations karong tuiga aron matubag ang nagkadako nga panginahanglanon sa kuryente nga sakop sa mga lugar nga ginaserbisyohan niini pinaagi sa real-time control ug protection operations.
Samtang sa pikas bahin, ang Davao Light ug Cotabato Light maghimo usab og paagi aron makab-ot ang tumong niini nga 100% ngadto sa tagsa-tagsa nga rural electrification program.
Sa pagkakaron, anaa na sa 99.02% ang completion rate niini ug padayon nga nagatinguha nga masuplayan ang katorse ka mga sitio sa katapusan ning tuig kasamtangan.
Via || Bombo Danica Baguio
