DAVAO CITY – Hingpit na nga milingkod sa iyang katungdanan ang bag-ong commander sa 10th Infantry (Agila) Division Philippine Army kini dungan sa gipahigayon nga simpleng seremonya nga gipahigayon sa Camp General Manuel T. Yan Sr., Mawab, Davao de Oro kagahapong adlawa.
Hingpit na nga gihulipan si Major General Jose C. Faustino Jr. ni Major General Reuben S. Basiao.
Nangatungdanan si Faustino sa 10th ID sulod sa usa ka tuig, usa ka bulan ug tulo ka adlaw diin daghanan na sab kini og accomplishments dili lamang sa combat operations apan lakip na ang pagpakiglambigit sa nagkadaiyang stakeholders nga nagsilbing dalan aron nga maangkon ang kahusay ug kalinaw sa komunidad sa Davao Region, pipila ka parte sa Region 12 ug Region 10.
Samtang ayha gibutang sa iyang katungdanan isip bag-ong commander sa 10ID, nagsilbi sumala pa si Major General Reuben S. Basiao isip Deputy Chief of Staff for Intelligence, General Headquarters Armed Forces of the Philippines.
Ilado sab ang nahisgutan isip respetado nga kanhi commander sa 701st Infantry Brigade, Philippine Army nga nakabase sa Mati, Davao Oriental.
Atol sa iyang pagpangatungdanan, malampuson niini nga nabungkag ang Guerilla front sa New Peoples Army (NPA).
Gani daghanan na sab sumala pa og naghimong kabag-ohan ang opisyal sa mga tahas nga gihatag kaniya.
Sakop si Basiao sa PMA “Maringal” Class of 1988.
