DAVAO CITY- Natunol na pagbalik sa tag-iya ang dakong kantidad sa kwarta human kini gipanawagan sa social media gumikan gikuha sumala pa kini sa usa ka lalaki ug babae sa usa ka kan-nan sa JP Laurel Avenue ning dakbayan sa Davao.
Kini ang gipaguwa nga pamahayag ni PMaj. Marvin Hugos ang OIC Station Commander sa Bajada PNP nga kaganihang pasado alas nuybi sa buntag nadawat na sa tag-iya ang dakong kantidad.
Nag-atubangay ang duha ka grupo sa buhatan sa Bajada PNP ug gisaksihan ang pagtunol sa kawarta ug ingon man gamit sa tag-iya.
Nasayran nga ang nakapunit ang naggikan sa Prk.25-A, Malagamot Panacan, nga ang lalaki nag-edad ug 55-anyos ug 51-anyos ang babae samtang ang tag-iya usa ka 29-anyos nga lalaki nga taga DDF Village Mandug ning syudad.
Mokabat sa P97,000 ang giuli nga kantidad gikan sa bag nga nakit-an sa mga wala panganling nakapunit. Wala sumala pa magdahom ang mga nahisgutan nga adunay kwarta ang bag. Una ng nagkatag sa socila media ang ilahang mga panagway human nakuhaan kini sa CCTV.
Gisaysay sab sa magti-ayon nga nakapunit sa bag nga sa balay na niini nadiskubrihan ang kantidad ug gilayon sumala pa nila kining gideposito sa bangko.
Sa karon, gipaklaro sab ni Major Hugos nga dili na pasakahan ug kaso ang mga nahsigutan sanglit dili na sab interisado ang nanag-iya sa maong salapi.
