Nakabsan sa kinabuhi ang usa ka lalaki nga sakay sa usaka motorsiklo human nga nadisgrasya sa dakbayan sa Tagum.
Subay sa report sa Tagum PNP, giila ang biktima nga si Felipe Roquero, backrider, hamtong ang pangidaron nga residente sa Mainit, Surigao del Norte.
Samtang ang drayber sa motorsiklo giila nga si Archer Consigna Jr., hamtong ang pangidaron nga taga-Siargao Island.
Subay sa imbistigasyon sa kapulisan, nahitabo ang disgrasya alas 4:45 sa hapon sa Daang Maharlika Highway, Brgy. Canocotan, dalkbayan sa Tagum.
Sumala pa nga samtang naglatas sa maong highway ang mga biktima padulong sa Tagum City, nawad-an matud pa og control ang motorsiklo hinungdan nga nabangga kini sa road island ug steel streetlight post.
Gumikan sa kakusog sa pagkabangga, nangalagpot sumala pa ang mga biktima sa ilang gisakyang motorsiklo hinungdan sa mga bun-og nga ilahang nahiaguman.
Sa gipahigayon nga pagresponde sa mga biktima daling gidala sa Davao Regional Medical Center sa Brgy. Apokon ang duha, apan nakabsan sa kinabuhi ang backrider nga si Roquero.
Samtang ang drayber ang padayon karon nga gi-atiman sa mga doktor sa maong ospital gumikan sa maong panghitabo.
Nagpahimango usab ang mga otoridad, nga mag-amping sa pagmaneho ang mga nagamotorsiklo ug likayan ang pagpakusog og dagan aron malikay sa disgrasya.
