DAVAO CITY – Pasakahan ug kaso ang usa ka babaeng pedestrian human sa nahitabong disgrasya kagahapong adlawa.
Subay sa pamahayag sa hepe sa Buhangin PNP nga si PMaj. Antonio Luy nga ipasaka ang kaso batok sa pedestrian nga Reckless Imprudence resulting in Homicide.
Samtang lakip sab sa pasakahan ug kaso ang drayber nga nagpanaog sa babaeng pedestrian nga anaa kini tungod sa pedestrian lane ayha kini nitabok diretso sa karsada bisan ug anaa pa sa go signal ang traffic light.
Apan, sa karon padayon pa nga ginaila ug ginapangita ang drayber sa pampasaheroan nga jeepney. Kahinumduman nga pasado alas kuatro ang takna kagahapon sa hapon nahitabo ang disgrasya sa CP Garcia Highway sa Catitipan, Buhangin Dist. atubangan sa cargo Terminal sa davao International Airport human nga naipit ang drayber sa truck ug pahinante niini gumikan sa pagfull brake sa sakyanan nga Prime mover nga adunay karga nga bakal niadtong tungura tungod sa kalit nga pagtabok sa babae nga pedestrian nga bisan ug green pa ang traffic light.
Gumikan sa kalit nga pagbrake, midailos ang lagpad nga mga bakal padulong ngadto kanila nga maoy hinungdan nga nadasok ang mga biktima ug naipit, nga miresulta sa ilahang kamatayon.
Girespondehan pa sa central 911 ang nasampit nga panghitabo ug nagdala pa kini ug mga cutting materials aron sa pagsalbar sa kinabuhi apan wala na kini natabang pa sa mga rescuers.
Tungod sa kakusog sa pagkadailos sa mga lagpad nga bakal, nangatanggal pa ang mga body parts sa ulo sa Prime over truck ilabi na ang wind shield nga anaa sa atubangan nga bahin ang nangabuak tungod sa maong panghitabo.
