DAVAO CITY – Gipasakahan na og kaso ang pasahero nga nag bomb joke sulod mismo sa Davao International Airport kaniadtong Dominggo sa gabii.
Gikanayon sa PNP Aviation Security Group, usa ka wala hinganling babayeng pasahero paingon sa Maynila ang gikatahong nangomedya sa flight attendant sa usa ka airline company atol sa on-boarding process nga aduna matud pay bomba sulod sa gisakyang eroplano.
Gumikan niini, gilayong gi-report dayon kini sa customer service agent sa maong airline ngadto sa mga otoridad.
Gikanayon sa Hepe sa Aviation Security Unit-Davao nga si Police Colonel Leo Ajero nga nagpahigayon ang Explosive Ordinance Disposal and K9 unit og paneling operation aron ipaagi sa inspeksyon ang tanang mga bagahe sa mga pasahero nga nagsakay sa Cebu Pacific Flight 5J978.
Samtang gidala sab ang maong pasahero sa Davao International Airport Police Station alang sa imbestigasyon ug dayong temporaryong gidetine sa Panacan Relocation Police Sub-Station.
Gikumpirma sab sa airport police nga dili taga-Davao ang maong pasahero.
Mag-atubang ang nahisgutan og kasong pagsupak sa Presidential Decree 1727, kon Anti-Bomb Joke Law.
Nagpahinumdum ang kapulisan nga dili magpakatag og bomb joke nga dili lamang maghatag og perwisyo ug kabalaka sa pasahero, kon dili, pagkatanggong sab sa bilangguan subay sa balaod.
Kung kahinumduman, aduna nay kasaysayan sa bombing ang Davao International Airport nga kaniadto Francisco Bangoy International Airport niadtong March 4, 2003, diin gikamatay kini sa 21 katao ug gikaangol sa daghanang indibidwal.
via || Bombo LJF
