DAVAO CITY – Nanawagan ang kapulisan ilabi na ang Talomo PNP nga makig-alayon gilayon kanila kung adunay nawad-an ug kabanay aron nga masayran ang pagkatao sa usa ka babaye nga nakitang walay nay kinabuhi.
Kahinumduman nga gituohang nalunod ug nakitang naglutaw-lutaw sa Davao River duol sa Holy Trinity Ecoland, Purok 33, Barangay 76-A, ang usa ka babaye kagahapon.
Sumala pa kang Davao City Police Office (DCPO) director Police Colonel Alexander Tagum, gilayon nga miresponde ang mga sakop sa kapulisan human nga nakadawat sila ug impormasyon nga adunay patay’ng lawas nga naglutaw sa suba.
Gihulagway lamang ang babaye nga biktima nga anaa sa 40-45 anyos ang edad, dunay gitas-on nga 5 ka tiil, nagsul-ob og itom ug puti nga sinina ug brown nga pantalon.
Sumala kang Tagum, nakilgmabigit na sila sa mga nagkadaiyang istasyon sa kapulisan aron masayran kung adunay nawala ng indibiduwal aron nga madetermina kung si kinsa ug taga-asa ang biktima. Gipahiluna karon ang patay’ng lawas sa biktima sa usa ka lokal nga punerarya ug gikatakdang ipailalom sa otopsiya.
