DAVAO CITY – Gipangandaman na sa DSWD 11 ang pay-out sa cash assistance nga ihatag alang sa mga gagmay kon micro rice retailers sa rehiyon nga ilabihang maapektuhan sa gipakanaog nga Executive Order 39 sa PBBM administration.
Sa pakighinabi sa Bombo Radyo Davao kang Michelle Franca, 4Ps Information Officer sa DSWD Davao, mamahimong makadawat kadtong nagkalisod nga mga piniling benepisyaryo og kinse mil pesos nga Cash Assistance ubos sa Sustainable Livelihood Program kon SLP.
Mamahimong kaabag sa maong buhatan ang DTI 11 sa pagpunting sa mga makadawat niini gikan mismo sa kaugalingon nilang listahan, ug ang DSWD 11 na ang mag-verify sa mga pangalan pinaagi sa assessment.
Human sa paghatag og ayuda, duna sab monitoring kon paunsa nila gigamit ang kwarta, ug ang ilahang pagtakda sa P41-P45 nga presyo sa bugas.
Pagaadtuan na lamang sa mga sakop sa DTI ug DSWD ang mga kwalipikadong rice retailers nga magsugod karong September 13 hangtud 14 sa mga unom ka mga syudad sa rehiyon, ug pipila ka mga munisipalidad sa rehiyon sama sa Kapalong, Asuncion ug Sto. Tomas sa Davao del Norte; Malita, Davao Occidental; ug Nabunturan, Davao de Oro.
Matud pa sa opisyal, dili musobra sa kinse mil ang ilang madawat.
Sumala sa DSWD 11, mukabat sa 152 ang inisyal pa lamang nga ihap sa mga micro rice retailers sa tibuok Davao Region ug posible pang madungagan ang ihap sa mga makadawat sa pay-out.
via || Bombo LJF
